Државата во текот на наредниот месец треба да ја исплати првата рата од солидарниот данок што компаниите го уплатија во 2023 година, согласно Законот за данокот на солидарност.
Од Министерството за финансии за МИА информираат дека процесот на враќање на средствата веќе е започнат. Донесен е правилник за изменување и дополнување на правилникот со кој се уредува формата и содржината на образецот за барање за поврат на повеќе или погрешно наплатен данок, а истиот е објавен во „Службен весник“. Компаниите треба да поднесат барање за поврат на средствата до Управата за јавни приходи, појаснуваат од Министерството за финансии.
Со Законот за данокот на солидарност беа опфатени компании кои во 2022 година оствариле вкупен приход поголем од 615 милиони денари. Согласно законот, во текот на 2023 година во Буџетот беа уплатени речиси 50 милиони евра од 156 компании.
Откако Уставниот суд го поништи Законот, државата презеде обврска да ги врати средствата уплатени по оваа основа. Врз основа на одлуката, Владата го задолжи Министерството за финансии, во координација со компаниите, да утврди модел за поврат на средствата. Притоа беше одлучено повратот да се реализира во две рати – во март 2026 и во март 2027 година.