Маж од српско потекло синоќа бил застрелан и убиен од страна на непознат напаѓач во Барселона, пренесуваат шпанските медиуми повикувајќи се на „АБЦ“.
Каталонската полиција соопшти дека врз жртвата, чиј идентитет сè уште не е официјално потврден, било пукано со неколку куршуми во областа Зона Франка.
Очевидци на настанот веднаш се обиделе да му помогнат на ранетиот маж.
Неколку сведоци се обиделе да го реанимираат, но без успех, и тој починал кратко потоа.
Полициските тимови во моментов спроведуваат интензивна акција за лоцирање и приведување на сторителот, кој веднаш по пукањето побегнал од местото на настанот.
Ова е втор ваков сериозен инцидент во истата област за многу краток временски период. Само две недели претходно, на истата улица и на само неколку метри од местото на синоќешниот напад, бил убиен уште еден маж.
Полициските извори засега ја исклучуваат можноста за поврзаност меѓу двата убиства. Истрагата сè уште е во тек и засега нема приведени.