Три безживотни тела се пронајдени попладнево на стрелиште во Даниловград, Црна Гора, а полицијата трага по вооружен осомничен за тројното убиство.
Околу 17 часот сопственикот на стрелиштето „Чешка збројевка“ ја известил полицијата дека во објектот затекнал три безживотни машки тела. Полицијата веднаш излегла на терен, а воведени се и засилени контроли на возилата кои се движат од Даниловград кон Подгорица.
Од Управата на полицијата соопштија дека, по налог на државен обвинител од Вишото државно обвинителство во Подгорица, се врши увид и се преземаат истражни дејствија за да се утврдат околностите под кои било употребено огнено оружје и дошло до смртта на тројцата мажи.
Полицијата ги идентификувала жртвите како П.Г. (24) од Подгорица, М.Р. (67) од Даниловград и Н.К. (20) од Подгорица. Според објавените информации, сите тројца биле вработени на стрелиштето.
Граѓаните се предупредени да останат во своите домови додека трае потрагата по вооружениот сторител.
Истрагата е во тек, а полицијата најави дека дополнително ќе ја информира јавноста по завршувањето на првичните истражни активности.