Градскиот воз од денеска е пуштен во сообраќај, а првата од планираните три линии ќе ги поврзува Зелениково и Новата железничка станица во Скопје.
Возот ќе сообраќа преку Ново Зелениково, Орешани, Јане Сандански, Драчево и Лисиче, со што жителите од овие населени места ќе добијат директна железничка врска со главниот град.
За реализација на проектот, ЈП „Железници Инфраструктура“ изврши реконструкција на железничката пруга на оваа делница, со цел да се подобрат условите за сообраќај и да се овозможи поголема брзина и капацитет на линијата.
Релацијата Зелениково – Нова железничка станица Скопје ќе ја опслужуваат три возови, а сообраќајот ќе се одвива според однапред утврден возен ред од страна на „МЖ Транспорт“.
Од Министерството за транспорт велат дека со „Градски воз“ се очекува да се овозможи побрз, поефикасен и поевтин начин на патување за граѓаните од приградските населби, но и за оние кои се движат кон централното градско подрачје.
Проектот има за цел подобро поврзување на периферните делови со Скопје, со пократко време на патување и помалку чекање. Дополнително, возниот ред е усогласен со линиите на ЈСП, што треба да овозможи полесно комбинирање на железничкиот и автобускиот превоз.
Во меѓувреме, се работи и на подготовка на преостанатите две линии. Едната е планирана да ги поврзува Новата железничка станица со Ѓорче Петров, преку Бутел и Скопје-Север, додека втората би се движела од Новата железничка станица преку Автокоманда и Маџари до Илинден.
Официјалното претставување на проектот е најавено за утре. На настанот се очекува да присуствуваат премиерот Христијан Мицкоски, министерот за транспорт Александар Николоски, претставници на „Железници Инфраструктура“ и „МЖ Транспорт“, како и градоначалникот на Скопје Орце Ѓеоргиевски и градоначалниците на Зелениково, Кисела Вода и Аеродром.
Како дел од промоцијата, предвидено е присутните симболично да го означат стартот на проектот со возење од железничката станица во Зелениково до Новата железничка станица во Скопје.