Трет смртен случај од западнонилска треска е регистриран во саботата во земјава, извести утрово министерот за здравство Сашо Клековски.
„Во саботата починатиот пациент имаше 61 година. Доаѓа од едно од афектираните места. Покрај вирусот пациентот имаше прекумерна тежнина“, рече министерот Клековски.
Првиот починат со западнонилска треска имаше 83 години и други претходни заболувања, додека вториот смртен случај беше 72-годишен пациент со тешка клиничка слика на менингоенцефалитис.
На Клиниката за инфективни болести во моментов се лекуваат 16 пациенти, од кои шестмина се во критична состојба, потврди директорот на Клиниката, Фадил Цана.
„Овие шестмина кои се во критична состојба и се лекуваат во Одделот за интензивна нега, се на возраст над 60, но кај инфицирани пациенти со невроинвазивна форма, најмладиот пациент кој е хоспитализиран е 25-годишен. Тој е во стабилна здравствена состојба и е во Одделот за невроинфекција“, рече директорот Цана.
Министерот Клековски соопшти дека во земјава моментално има вкупно 35 потврдени случаи на заразени со западнонилска треска и тројца сомнителни кои се во процес на дијагностицирање. Од хоспитализираните 16 лица, 15 се на Инфективната клиника, а едно лице се лекува во приватна болница. Досега се регистрирани и 15 излекувани пациенти кои се отпуштени од Инфективната клиника.
Според Клековски, најголемо жариште на вирусот во Европа во моментов е Атина, но тој веќе се шири и во пограничните зони.
„Во Грција има досега 81 случај со нервна инвазивна форма и 9 починати и веќе има и во пограничните зони со Македонија — во Центарална Македонија, регионот во Грција“, рече министерот Клековски.
Тој додаде дека здравствените капацитети за препознавање и дијагностика на вирусот се максимално подигнати. Вирусот се потврдува со два независни теста, за што веќе се известени сите лекари кои би можеле да дојдат во контакт со заболени.