Собраниската Комисија за финансирање и буџет денеска ќе ја продолжи расправата за Предлог-ребалансот на Буџетот за 2026 година во второ читање.
Станува збор за трет ден од општата расправа во матичната комисија, по чиј завршеток ќе следува разгледување на поднесените амандмани. За ребалансот се доставени вкупно 224 амандмани – 87 од ДУИ, 78 од СДСМ, 51 од Левица и осум од Коалицијата ВРЕДИ. Согласно собранискиот Деловник, комисиската расправа може да трае најмногу десет работни дена, по што предлогот ќе се најде на пленарна седница.
Образложувајќи го ребалансот, министерката за финансии Гордана Димитриеска-Кочоска истакна дека измените не се резултат на недостиг на приходи или нарушена ликвидност, туку на потребата буџетските проекции да се усогласат со актуелните економски услови. Според неа, со ребалансот се обезбедуваат дополнителни средства за редовна исплата на плати во секторите каде што има зголемување, за поддршка на земјоделството, социјалната заштита, општините и за интензивирање на капиталните инвестиции.
Таа посочи дека расходите за стоки и услуги се намалуваат за околу 837 милиони денари преку реалокација на средства, додека капиталните инвестиции се зголемуваат за околу 5,8 милијарди денари и ќе достигнат речиси 46 милијарди денари, што претставува раст од 14,5 проценти во однос на првично планираниот буџет.
Според министерката, буџетскиот дефицит ќе биде ревидиран на 46,3 милијарди денари, односно 4,1 процент од бруто-домашниот производ, при што, како што нагласи, зголемувањето првпат е директно поврзано со повисоки капитални расходи и инфраструктурни инвестиции.
Во текот на досегашната расправа, пратениците од владејачкото мнозинство оценија дека ребалансот претставува неопходно усогласување на јавните финансии со актуелните економски услови и овозможува повеќе средства за плати, социјални трансфери, капитални проекти и инфраструктура. Од опозицијата, пак, сметаат дека Владата повторно се потпира на повисок буџетски дефицит и ново задолжување, без да понуди суштински решенија за инфлацијата, растот на цените и другите економски предизвици.
Со предложениот ребаланс, вкупните приходи се проектирани на 379,5 милијарди денари, при што даночните приходи остануваат речиси непроменети и изнесуваат 213,2 милијарди денари. Неданочните приходи се зголемуваат за речиси две милијарди денари, а донациите за околу 2,7 милијарди денари.
Вкупните расходи се ревидираат на 425,8 милијарди денари. Дополнителни средства се предвидени за земјоделски субвенции, железничкиот сообраќај, спортот, студентскиот и ученичкиот стандард, како и за реализација на капитални проекти од стратешко значење.