Претседателот на ССМ, Слободан Трендафилов, упати остри критики до Владата откако утрово пропадна најавеното потпишување на Спогодбата за зголемување на минималната плата. Според него, претставниците на извршната власт не се појавиле на состанокот закажан во 9 часот, каде требаше да се официјализира „минималец“ од 600 евра во нето износ.
„Денеска паднаа маските и се разобличија лагите. Претставникот на Владата не дојде како што го поканивме. Се потврди дека приоритет не им се работничките плати, ниту зголемувањето на минималната плата за која претходно даваа изјави“, објави Трендафилов.
Синдикатот бара новата висина на платите да почне да се исплаќа веќе со февруарската плата, при што освен минималната од 600 евра, се бара и линеарно зголемување на сите останати плати за најмалку 6.000 денари. Иако Владата не дојде на потпишување, Трендафилов го поздрави прифаќањето на предлогот на УПОЗ за повисоки плати во управата и правосудството, но побара тоа веднаш да се стави на хартија преку колективен договор.