Автоматско усогласување на платите со трошоците за живот, државна поддршка за фирмите кои ги вреднуваат работниците и сериозен раст на пензиите во еден мандат, предлага опозицискиот СДСМ како одговор на тешката социјална состојба во државата.
Потпретседателката на партијата Јована Тренчевска денеска ја претстави програмата „Твоја држава – твоја шанса“, нагласувајќи дека фокусот мора да се стави врз социјалната правда и работничките права.
- Правда е минималната плата автоматски да се усогласува со трошоците за живот, инфлацијата и просечната плата. Ако растат цените, мора да растат и платите. Тоа е една од нашите мерки. Поголеми плати кога компаниите имаат поголем профит – воведувавме принцип според кој ако расте профитот на компанијата, мора да расте и платата на работникот. Правично е ако расте профитот на компанијата, да расте и платата на работникот. Трудот мора да биде вреднуван, а успехот правично распределен – изјави Тренчевска.
Таа појасни дека државата треба да воведе олеснувања во даночната политика за менаџерите кои одлучуваат да го зголемат доходот на вработените, со цел да се стимулира реалниот сектор.
- Државна поддршка за повисоки плати – намален данок на добивка или субвенционирање на придонесите за компаниите што ги зголемуваат платите. Праведно е државата да ги стимулира компаниите што ги зголемуваат платите, наместо да ги наградува оние што заработуваат на грбот на работниците. Правда е пензиите да растат и да обезбедуваат достоинствен живот. Затоа предвидуваме зголемување на пензиите до 50 проценти во еден мандат – потенцираше Тменчевска.
Како дополнителни социјални столбови, од СДСМ најавија признавање на студентскиот стаж, заштита на сезонските работници и хонорарците, воведување дигитален пасош за работниците, како и посебни додатоци за домување и покривање на трошоците за градинка на самохраните родители.