Цената на дизелот надмина 100 денари за литар, што е нов директен удар врз стандардот на граѓаните, но и врз македонското земјоделство, обвини на денешната прес-конференција потпретседателката на СДСМ, Јована Тренчевска. Според неа, за само шест месеци цената на овој енергенс е зголемена за 43 проценти, што неминовно ќе доведе до нов ценовен бран кај храната.
„Над 100 денари за литар дизел значи нов ценовен удар врз секое македонско семејство. Поскапото гориво значи поскап транспорт, поскапо производство и на крајот – поскапа храна. Во услови кога потрошувачката кошничка веќе достигна речиси 70.000 денари, а платите стагнираат, секој нов денар на лебот, млекото, зеленчукот и овошјето е директен удар врз семејната трпеза. Половина од семејниот буџет на македонските граѓани оди за храна и пијалаци. Овој ценовен бран затоа ќе биде уште потежок“, потенцираше Тренчевска.
Потпретседателката на опозициската партија посочи дека последиците особено ги чувствуваат земјоделците, кои се соочуваат со зголемени трошоци за производство и проблеми со откупот.
„Земјоделците денес повторно протестираат за откупните цени на пиперката, за она што Владата на Мицкоски им го вети, а не им го испорача. Ги излажа. Откупот на пиперката не се решава со прес-конференции, лаги и манипулации, туку со конкретни мерки и сигурен откуп. СДСМ ги поддржува барањата на земјоделците. Во време на СДСМ откупната цена беше 50 денари за килограм. Денес Владата треба да обезбеди и повеќе од 50 денари, затоа што во меѓувреме трошоците за производство значително се зголемени“, рече таа.
Тренчевска предупреди дека порастот на цените на горивата, ѓубривата и проблеми со наводнувањето директно ја загрозуваат прехранбената сигурност на земјата.
„Земјоделецот не живее од прес-конференциите на Мицкоски и од лажните ветувања. Живее од цената на својот производ, од сигурен откуп и навремена исплата. Живее од тоа дали може да купи гориво, семе и ѓубриво за следната сезона. А токму тие трошоци растат. Горивото поскапува, ѓубривото поскапува, наводнувањето е проблем, субвенциите доцнат или се намалуваат“, истакна Тренчевска.
Според неа, неопходни се итни чекори од страна на властите за заштита на куповната моќ на граѓаните и домашниот аграрен сектор.
„Македонија има земја, вода, сонце, традиција и вредни земјоделци. Можеме да произведуваме храна и за себе и за регионот. Во време кога целиот свет се подготвува за глобален проблем со поскапа храна, Владата на Мицкоски не презема ништо. Напротив, со ваквата политика на ВМРО-ДПМНЕ земјоделците едвај преживуваат, домашното производство се намалува, зависноста од увоз расте, а храната ќе станува сè поскапа“, порача Тренчевска.
Таа додаде дека е потребно итно креирање мерки за ублажување на состојбите.
„Ова е систематско уништување на домашното производство и губење на прехранбената сигурност на државата. Владата мора итно да реагира – со мерки за заштита на стандардот, со поддршка за земјоделците и со обезбедување сигурен откуп и услови за производство. Граѓаните не можат да чекаат, земјоделците не можат да чекаат. Мицкоски мора да преземе одговорност и да престане да се крие зад празни ветувања“, заклучи потпретседателката на СДСМ.