Американскиот претседател Доналд Трамп веќе седми ден не се појавува во јавноста, што повторно ги покрена дискусиите за неговата здравствена состојба пред неговиот 80-ти роденден, кој ќе го прослави на 14 август.
Загриженоста во американските медиуми се појави откако новинарот Арон Рупар предупреди дека Трамп нема одржано јавен настан или прес-конференција од состанокот на администрацијата на 27 мај. Оттогаш, претседателот е виден само во претходно снимено телевизиско интервју, а дополнителни шпекулации предизвика неговата неколкучасовна посета на Воено-медицинскиот центар „Волтер Рид“ пред неговото последно појавување.
Како што пишува „Мирор“, дел од медицинските експерти изразија сериозен сомнеж за официјалните резултати од прегледите објавени од Белата куќа, каде се тврди дека претседателот е во „одлично здравје“.
„Васкуларниот хирург Вилијам Шуце за американските медиуми изјави дека резултатите изгледаат ‘речиси премногу добри за да бидат вистинити’ за личност на возраст од Трамп. Слична реакција имаше и медицинскиот аналитичар на Си-Ен-Ен, Џонатан Рајнер, кој се запраша зошто претседателот направил уште една КТ скен на срцето само неколку месеци по претходниот преглед“, стои во извештаите.
Самиот Трамп и неговиот личен лекар, капетанот на американската морнарица Шон Барбарела, веднаш ги отфрлија ваквите сомнежи, нагласувајќи дека за време на редовниот медицински преглед „се било совршено“ и дека тој останува во одлична физичка форма.
Од Белата куќа редовно укажуваат дека Трамп, кој во моментов е најстариот човек кој ја преземал оваа функција во САД, е целосно способен за извршување на обврските.
„Портпаролот на Белата куќа Дејвис Ингл неодамна изјави дека Трамп е ‘енергичен, исклучително активен и секојдневно фокусиран на решавање на проблемите и исполнување на ветувањата кон гласачите’“, се наведува во официјалниот став.
За потсетување, минатата година на претседателот му беше дијагностицирана хронична венска инсуфициенција, а администрацијата претходно појасни дека модринките на неговите раце се резултат на секојдневното земање аспирин и честите ракувања со граѓаните.