Американскиот претседател Доналд Трамп ја започнал воената офанзива врз Иран и покрај предупредувањата од разузнавачките служби, потпретседателот Џеј-Ди Венс и дел од високите воени советници дека конфликтот може да предизвика сериозни последици, објави „Волстрит џурнал“.
Според весникот, тогашната директорка на Националното разузнавање Тулси Габард предупредила дека евентуалното убиство на иранскиот врховен лидер може да доведе до уште порадикална власт во Техеран и затворање на Ормускиот Теснец, една од најважните светски рути за транспорт на нафта и гас. Венс, пак, се залагал за повнимателен пристап и продолжување на дипломатските преговори.
И дел од американските воени претставници предупредувале на можен недостиг од муниција и преоптоварување на вооружените сили во случај конфликтот да се одолжи. Според извештајот, Трамп ги отфрлил ваквите стравувања, убеден дека американската армија ќе може да одговори на сите проблеми што би се појавиле.
Војната започна на 28 февруари, а шест месеци подоцна и натаму нема конечен исход. Конфликтот предизвика човечки жртви, притисок врз американските воени капацитети и нарушувања на енергетските пазари поради проблемите со пловидбата низ Ормускиот Теснец.
Со растот на цените на горивата и продолжувањето на конфликтот, според „Волстрит џурнал“, дел од сојузниците на Вашингтон на Блискиот Исток почнале да вршат притисок за дипломатско решение. По неуспешните нуклеарни преговори, администрацијата на Трамп повторно се насочи кон засилен економски притисок врз Техеран преку санкции и други мерки.