Трамп: Ќе запрам нелегален влез, ќе прогласам национална вонредна состојба на јужната граница

Во своето инаугуративно обраќање, претседателот Доналд Трамп вети златно доба за Америка, неколку минути откако по вторпат положи заклетва како претседател во извонредно политичко враќање по два обиди за атентат, кривично дело и обвинение за обид да го поништи неговиот изборен пораз во 2020 година.

„Златното доба на Америка започнува сега“, рече Трамп, нагласувајќи дека под негово водство земјата „ќе процвета и ќе биде почитувана“.

Тој тврдеше дека победата му дала мандат да го смени „ужасното предавство на американскиот народ“.

Тој ја осуди администрацијата на поранешниот претседател Џо Бајден и нејзиното справување со мигрантската криза, велејќи дека земјата има криза на „доверба“ во сопствената влада.

Потсетувајќи се на обидот за атентат што го преживеал за време на кампањата, тој рече дека Бог го спасил за да „ја направи Америка повторно голема“ и заклучи дека денот на неговата инаугурација е денот на ослободувањето на земјата.

Ќе прогласи вонредна состојба на јужните граници и ќе бидат стопирани сите нелегални влезови и ќе започне депортацијата на илегалните мигранти, што беше поздравено со аплауз од толпата. Тој повторно ќе ја воведе антиимигрантската политика „престој во Мексико“ и ќе испрати војска да „одбие деструктивна инвазија на земјата“.

Тој ќе ги прогласи нарко-картелите за терористички организации со цел да го спречи влезот на дрога во земјата, а најави и жестоко сузбивање на криминалот во земјата.

Тој најави и промена на енергетската политика.

Америка повторно ќе има производство, вклучително и автомобилската индустрија, и ќе произведува енергија што ќе се извезува низ целиот свет, рече Трамп.