Американскиот претседател Доналд Трамп ја поздрави можноста за одржување директна средба меѓу претседателите на Русија и Украина, Владимир Путин и Володимир Зеленски, пренесуваат локалните медиуми во САД.
Шефот на Белата куќа пред новинарите во Овалната соба истакна дека официјален Вашингтон имал свое влијание врз ваквиот развој на настаните на релација Москва – Киев.
„Мило ми е што зборуваат за средбата. Мислам дека влијаевме на неа. Мислам дека би било одлично ако се сретнат“, изјави американскиот претседател.
Трамп дополнително појасни дека доколку дојде до реализација на оваа лидерска средба, и Путин и Зеленски ќе бидат принудени да прифатат одредени отстапки.
„Јас ги предложив тие компромиси. Тие мора да престанат. Минатиот месец беа убиени 25.000 луѓе. Војници, претежно војници. Имаше и цивили“, рече американскиот претседател.
Оваа реакција доаѓа откако Зеленски синоќа јавно предложи директни преговори со рускиот колега во трета земја, како Швајцарија, Турција или арапските држави, на што портпаролот на Кремљ, Дмитриј Песков, одговори дека украинскиот претседател може да дојде во Москва во секое време.
Како потсетување, Русија ја започна воената инвазија врз Украина на 24 февруари 2022 година, а прашањето за прекин на огнот во моментов е во фокусот на светската дипломатија.