Медиумите на албански јазик во Македонија го објавија идентитетот на 26-годишната девојка од земјава која вчера трагично го загуби животот во тешка сообраќајна несреќа во Албанија.
Станува збор за Елмедина Љога од струшкото село Ливада.
По објавувањето на оваа информација, во јавноста беа споделени и нејзини фотографии, а веста предизвика голема тага кај жителите на струшкиот регион и пошироко.
Тешката сообраќајна несреќа се случила вчера на патниот правец Поградец – Ќафасан.
Според достапните информации, младата девојка била сопатничка во автомобил управуван од друга жителка на истото струшко село.
Возилото во кое се наоѓала настраданата директно се судрило со автомобил управуван од албанска државјанка од градот Корча.
Во силниот судир најтешко настрадала 26-годишната сопатничка, која како последица на здобиените повреди починала на самото место.
Двете возачки на возилата по несреќата веднаш биле пренесени во болница на понатамошно лекување.
Според последните информации од надлежните медицински лица, нивната здравствена состојба во моментов е стабилна и тие се наоѓаат надвор од животна опасност.
Надлежните истражни органи во Албанија продолжуваат со истрагата на терен за да ги утврдат сите околности и причините кои довеле до оваа трагична сообраќајна несреќа.