Две лица го загубија животот, а три се повредени во тешка сообраќајна несреќа што се случила синоќа на автопатот Куманово – Скопје, кај Агино Село, соопшти СВР Куманово.
Несреќата се случила синоќа околу 21:35 часот, кога дошло до судир помеѓу патничко возило „мерцедес“ со скопски таблички, управувано од 65-годишниот М.М. од Скопје, и патничко возило „опел корса“, исто така со скопски ознаки, управувано од 27-годишниот С.Н. од Скопје.
„На местото на настанот починале сопатниците од возилото опел корса В.Н. (49) и Л.М. (71) од Скопје. Л.Н. (48), сопатничка од возилото „опел корса“ се здобила со тешки телесни повреди, а сопатникот Б.Н. (28) и С.Н. (27) од Скопје се здобиле со телесни повреди и биле пренесени во Комплекс клиники „Мајка Тереза“ во Скопје“, соопшти кумановската полиција.
Увид на местото на несреќата извршила екипа од СВР Куманово. По наредба на јавен обвинител, возачот на „мерцедесот“, М.М., е лишен од слобода.
По целосно документирање на случајот, против него ќе биде поднесена соодветна пријава.