Летото засега нема намера да попушти. Високите температури ќе продолжат и во последните денови од август, а според долгорочните прогнози, невообичаено топло време нè очекува и на почетокот од септември.
Во следните денови максималните температури ќе се движат меѓу 36 и 39 степени, а најтопло се очекува околу 28 август, кога прогнозата покажува и до 39 степени. Високи температури ќе има и последниот ден од месецот, со околу 35 степени.
Без поголемо освежување ќе започне и метеоролошката есен. На 1 септември се прогнозираат околу 37 степени, а во првите денови од месецот дневните температури ќе останат над 30 степени – од 35 степени на 2 септември, до околу 32 степени кон крајот на првата недела.
Постепено намалување се очекува дури од 6 септември, но и тогаш ќе остане натпросечно топло, со дневни температури околу 28 до 29 степени. Слично време, претежно сончево и топло, според сегашните долгорочни проекции ќе се задржи и во средината на месецот.
Позначително заладување се наѕира дури во последната недела од септември, кога дневните температури би можеле да се спуштат кон 20 до 25 степени, со поголема можност за облачност и врнежи.
Тоа значи дека по исклучително жешкиот крај на август, и почетокот на есента ќе помине во знакот на летни температури. Сепак, станува збор за долгорочна прогноза која може да претрпи промени како што се приближуваат датумите.