Српската пејачка Теа Таировиќ и нејзиниот сопруг Иван Вардај учествувале во сообраќајна несреќа која се случила во Црна Гора, во ноќта меѓу 4 и 5 август.
Според информациите, инцидентот се случил околу еден часот по полноќ на кружниот тек на самиот влез во Будва.
Во сообраќајната несреќа нивниот автомобил претрпел голема материјална штета, но за среќа нема потешко повредени лица.
Според сведочењата на очевидци, во моментот на сударот се слушнал силен удар. Поради тоа, мештаните од блиските куќи веднаш излегле надвор за да видат што се случува и да им помогнат на патниците сè до пристигнувањето на полицијата и екипите на итната помош.
Еден од очевидците на настанот посочи дека најважно е тоа што сите излегле од автомобилот и дека никој не е тешко повреден.
Тој дополнително појасни дека на тоа конкретно место и претходно се случувале сообраќајни незгоди, бидејќи патот е тесен, неосветлен и нема поставено знак кој предупредува дека следува кружен тек.
Иако возилото било речиси целосно уништено, пејачката и нејзиниот сопруг се спасиле без сериозни повреди.
Таировиќ наводно била видно потресена и вознемирена од настанот, но откако било утврдено дека не ѝ е потребна дополнителна медицинска помош, таа го продолжила патот кон нејзиниот однапред закажан настап.