Четиригодишно момче и двегодишно девојче починаа од труење со чад во куќа во романскиот град Талмациу, во округот Сибиу, откако во собата каде што спиеле дошло до опожарување од електрична греалка.
Според првичните информации, на трагедијата ѝ претходел душек што тлеел откако ткаенини се запалиле од електричниот уред кој се користел за загревање на просторијата. Службите за итни случаи добиле повик околу 19:30 часот, со пријава дека една од собите е исполнета со чад.
Спасувачките екипи ги пронашле децата во несвест и во кардиореспираторен застој, по што веднаш започнале со обиди за реанимација.
„Децата биле пронајдени во кардиореспираторен застој поради труење со чад. Мерките за реанимација биле применувани околу еден час“, изјави Елена Ангелика Бутанеску, лекарка специјалист во Општата болница во Сибиу.
И покрај напорите на медицинскиот тим, децата не реагирале на реанимацијата и била констатирана смрт.
Во моментот на инцидентот, мајката на децата била во друга соба од изнајмената куќа и според достапните информации, не сфатила навреме што се случува. Се наведува дека таа претходно била жртва на семејно насилство и до јуни била дел од програма за заштита, по што сама се грижела за децата.
По трагедијата се огласи и градоначалникот на Талмација, Јоан Оанца, кој изрази надеж дека овој случај ќе послужи како предупредување за внимателно користење на грејните тела во постудените месеци.
Телата на децата се пренесени на обдукција, а полицијата и надлежниот инспекторат спроведуваат истрага. Отворен е случај за предизвикување смрт од небрежност.