Македонското новинарство денеска загуби еден од своите најпрепознатливи гласови во внатрешната политика. По долго боледување, на 53-годишна возраст почина новинарката на Медиумската информативна агенција (МИА), Ирена Радовановиќ.
Радовановиќ ја започна својата кариера во неделникот „Фокус“ во 1991 година, каде работеше една деценија. Нејзиниот професионален пат продолжи низ редакциите на „Вечер“, „Нова Македонија“, „Македонија денес“ и неделникот „Денес“. Својот новинарски печат го остави и во неделникот „Форум“, дневниот весник „Дневник“ и Радио „Слободна Македонија“.
Од 2014 година, таа беше дел од внатрешно-политичката редакција на МИА, работејќи како новинар и аналитичар. Колегите ја опишуваат како исклучителен професионалец чија посветеност трајно ќе остане запаметена во фелата.
Од својата долгогодишна колешка се збогуваше и директорот на МИА, Дарко Јаневски, кој преку социјалните мрежи ја сподели тешката вест: „Си замина нашата Ирена. Се боревме година и половина. Тешко, со болка, но и со надеж. Мала, но надеж. На крај, се предаде. Така, има години, месеци и денови кои се баш тешки. Овие се токму такви“, напиша Јаневски.
МИА изрази длабоко сочувство до нејзиното семејство. Погребот ќе се изврши утре на гробиштата во Радишани во 11:00 часот, а телото ќе биде изложено во капелата од 10:30 часот.