Пратеничката група на ВМРО-ДПМНЕ ќе достави предлог-измени на Законот за безбедност на сообраќајот на патиштата, со кои се предвидува сериозно заострување на казнената политика и регулативата за користење електрични тротинети.
Оваа информација денеска ја соопшти министерот за внатрешни работи, Панче Тошковски.
Според Тошковски, деталните анализи на МВР покажуваат дека најголем број сообраќајни несреќи во кои учествуваат електрични тротинети се регистрирани кај младата популација.
Како особено критична група министерот ги посочи младите лица на возраст до 17 и 18 години.
Тошковски нагласи дека нелегалното управување со тротинети, возењето по две или повеќе лица на едно возило, непочитувањето на сообраќајните правила и некористењето соодветна заштитна опрема често резултираат со сериозни последици по здравјето на граѓаните.
Како дел од најавените законски измени, покрај построгите казни, сериозно се разгледува и опцијата за зголемување на старосната граница под која ќе биде дозволено управување со електрични тротинети на патиштата.