Голем пожар избувнал на танкер за сурова нафта во Црното Море, во близина на Сочи, откако, според руските власти, бродот бил погоден од беспилотно пловило.
Станува збор за танкерот „Афримакс рио“, кој пловел под либериско знаме. По нападот избувнал пожар, а сурова нафта се излеала и горела на морската површина.
Сите 23 членови на екипажот, индиски државјани, биле евакуирани и според досега објавените информации нема повредени.
Снимките од Сочи покажуваат густ црн чад и високи пламени јазици околу танкерот. Поради пожарот, властите привремено го ограничиле пристапот до дел од плажите и крајбрежјето и започнале мониторинг на воздухот и водата.
Руското Министерство за транспорт соопштило дека пожарот првично бил премногу силен за спасувачките екипи безбедно да му се приближат на бродот, но подоцна огнот бил ставен под контрола.
Танкерот во моментот на инцидентот, според неофицијални информации, превезувал сурова нафта од Новоросијск кон Индија и бил речиси целосно натоварен.
Бродот се наоѓа на украинска „црна листа“ како дел од таканаречената руска „фантомска флота“, но не е на санкциските листи на Европската Унија.
Москва тврди дека станува збор за напад со беспилотно пловило, додека Украина засега нема преземено одговорност за инцидентот.