Министерката за образование и наука, Весна Јаневска, денеска потврди дека професорот од средното уметничко училиште „Лазар Личеноски“, кој беше пријавен за сексуално вознемирување на ученичка, е суспендиран од работа. Случајот кој ја вознемири јавноста веќе е во рацете на истражните органи и Државниот просветен инспекторат.
МВР претходно информираше дека 52-годишниот професор е лишен од слобода по пријава дека во период од неколку дена вознемирувал 18-годишна ученичка.
„Државниот просветен инспекторат постапува. Пријавен е во полицијата“, истакна кратко Јаневска. Според полицискиот билтен, наставникот барал од ученичката да имаат полови односи, по што веднаш била покрената постапка.
Основниот кривичен суд Скопје веќе му одреди мерки на претпазливост на осомничениот, вклучувајќи забрана за вршење на работни активности и забрана за приближување до ученичката.