Со изведување на материјални докази од страна на Обвинителството, денеска во судницата во „Идризово“ продолжи судскиот процес за пожарот во кочанската дискотека „Пулс“, во кој загинаа 63 лица, а над 200 беа повредени.
Обвинителството презентираше докази поврзани со агенцијата за обезбедување „Рубикон Секјурити Солушнс“, кои се однесуваат на организацијата на обезбедувањето на објектот, плановите за надзор, како и на извршените и неизвршените обврски.
Во судницата беше приложена дозвола за работа на „Рубикон“ и список на вработени, при што Обвинителството наведе дека во агенцијата биле ангажирани Јане Јанчевски, Мартин Георгиев, Лазар Захариев и Стојанчо Димитриев. Според обвинението, Георгиев, Захариев и Димитриев поседувале лиценца за обезбедување, додека Ивица Грозданов не поседувал.
Беше презентирана и фото-документација, како и материјали прибавени при претрес на канцелариите на „Рубикон“ и одземена документација.
На почетокот од рочиштето, Судот го информираше Обвинителството за предлог на одбраната на обвинетите Александар Нацев и Јане Јанчевски да не се изведуваат докази поврзани со анализа на метаболити во крв и урина, оценувајќи ги како незаконити и нерелевантни.
Одбраната посочи дека овој доказ навлегува во приватната сфера на обвинетиот и дека не е јасно зошто би бил релевантен, имајќи предвид дека бил обезбеден три месеци по настанот и дека Нацев не бил присутен на лице место.
Адвокатот на Нацев изјави дека се противи на изведување на доказот, оценувајќи го како нерелевантен за предметот.
Од Обвинителството, пак, беше наведено дека доказот е обезбеден со наредба на ОЈО Скопје и доставен до ОЈО Кочани, како и дека е дел од доказниот материјал против обвинетиот Нацев.
Судот оцени дека постапката ќе продолжи со изведување на останатите докази, по што ќе се произнесе и за спорните предлози.
На рочиштето обвинетиот Шабан Салиу изнесе забелешки на претходно изведените докази, наведувајќи дека не произлегува негова одговорност како директор на Дирекцијата за заштита и спасување во периодот 2012–2017 година.
Сличен став изнесе и одбраната на обвинетиот Аднан Џаферовски, која посочи дека неговата позиција е идентична со таа на Салиу, но за периодот 2017–2021 година.
Судењето продолжува во фаза на доказна постапка со изведување на материјални докази од Обвинителството.
Пожарот во дискотеката „Пулс“ во Кочани избувна на 16 март 2025 година за време на настап на групата ДНК и претставува една од најтешките трагедии во поновата историја на земјата. Судењето го води судијката Дијана Груевска-Илиевска, а обвинението го застапува тим од 15 јавни обвинители.