Со изведување на материјални докази од Обвинителството денеска во судницата во „Идризово“ продолжи судењето за пожарот во кочанската дискотека „Пулс“, во кој загинаа 63 лица, а над 200 беа повредени.
Пред Судот беа презентирани докази поврзани со објектот, неговата сопственост и движењето на имотот, односно целокупната фактичка, правна и сопственичка историја на објектот во кој се наоѓала дискотеката.
Беа презентирани и 19 записници од вршење увид од комунални инспектори во кафе-бар „Класик“, во кои како управител се наведува Митко Стојанов, а увидите биле извршени во негово присуство.
Потоа беа приложени докази поврзани со барање од Никола Кузманов за изградба на деловен објект од 1999 година, заедно со план, проект и елаборат за градба, како и одобрение за градба издадено од Министерството за урбанизам и градежништво.
Презентирана беше и документација од Гроздан Милковски – сопственик на имотот на кој се наоѓала и функционирала дискотеката „Пулс“, како и документи поврзани со легализација на бесправна градба и доградба на објектот извршена без соодветна документација.
На претходното рочиште беа изведени видео-снимки и фотографии од објектот и од критичната вечер, како и материјали од периодот додека клубот функционирал.
На почетокот на денешното рочиште, Судот укажа дека доказите се доставени во оригинал и дека одбраната може да изврши увид доколку сака.
Одбраната на Митко Стојанов достави предлог за укинување на мерката притвор и нејзина замена со мерки за претпазливост, наведувајќи дека тој подолг период е без работа и приходи и има обврски за отплата на хипотекарен кредит.
Пожарот во дискотеката „Пулс“ во Кочани избувна на 16 март 2025 година за време на настап на групата ДНК и претставува една од најтешките трагедии во поновата историја на државата. Судењето го води судијката Дијана Груевска-Илиевска, а обвинението го застапува тим од 15 јавни обвинители.