Во денешната емисија „Студио 10“ на телевизија 24 гостуваше пратеничката од редовите на ВМРО-ДПМНЕ, Дафина Стојаноска, која зборуваше за Предлог буџетот за 2026 година истакнувајќи дека е развоен и скроен по мерка на граѓаните, за економски раст и развој на државата.
„Највисок Буџет досега 6,7 милијарди евра, но за разлика од претходни буџети ова е повисок буџет, но ќе има помал дефицит, разликата помеѓу наплатата и потрошувачката овој пат за прв пат ќе се намалува, што значи ги зголемуваме наплатите, додека расходите многу внимателно и плански ќе ги реализираме. Она што е ветено ќе се реализира и затоа за капитални инвестиции овој пат велиме дека е издвоена таа сума која и реално ќе се реализира, видовме и пред два дена Европската комисија го оцени Буџетот дека дава надеж“, вели Стојаноска.
Пратеничката Стојаноска во своето гостување истакна дека со Буџетот е предвидено зголемување на платите и пензиите, како и инвестирање во капитални проекти, посочувајќи дека ќе се постигне економски раст и фискална консолидација.
„Со овој Буџет се предвидени зголемени средства за плати и за пензии, но паралелно ќе имаме и капитални инвестиции, сето тоа е предвидено со овој буџет. На крајот на владеењето на СДСМ и ДУИ ние начекавме неисплатени по три, четири плати во Пошти, Водостопанство, Железници и Национални шуми, мора од овој буџет граѓаните да бидат мирни дека ќе имаат следствено покачување и на платите и на пензиите. Овој Буџет дава надеж дека државата ќе се постави на вистинска патека, ќе се стабилизираме и полека полека ќе се постигне и фискална консолидација и економски напредок, се што е вештачки напумпано гледате до каде не доведе, до долгови кои ни се оставени во наследство“, рече Стојаноска.