Градоначалникот на општина Гази Баба, Бобан Стефковски, денеска претседаваше со проширената седница на Локалниот совет за превенција, посветена на безбедноста во училиштата и спречувањето на меѓуврсничкото насилство. Советот најостро го осуди секој вид насилство, порачувајќи дека за него не постои оправдување.
Седницата беше свикана по инцидентот во основното училиште во населбата Ченто. Иако случајот е оценет како изолиран, на седницата беа донесени низа заклучоци за заштита на учениците и одржување безбедна средина.
„Локалниот совет за превенција при Општина Гази Баба најостро го осудува случајот на меѓуврсничко насилство случен во основно училиште во населба Ченто, при што беше повреден ученик, оценувајќи дека секој вид насилство е апсолутно неприфатлив и недозволив“, се вели во првиот заклучок од седницата.
Меѓу клучните мерки е задолжувањето на сите основни училишта за засилена контрола на куќниот ред и дисциплината. Исто така, се укажува на потребата од навремено препознавање на девијантните облици на однесување преку поголем ангажман на стручните служби.
Советот даде поддршка и за иницијативата на Министерството за образование за зајакнување на механизмот „дежурен наставник“, како и за доследно почитување на процедурите за користење мобилни телефони за време на наставата.
На седницата присуствуваа претставници на МВР, МОН, верските заедници, Црвениот крст, пратеници и директори на училиштата. Општината најави дека ќе продолжи со едукативни кампањи и јавни дебати за подигање на јавната свест против насилството.