Во скопската населба Автокоманда во тек се градежни активности за уредување на јавните површини со поставување на нови павер елементи, информираше градоначалникот на Општина Гази Баба, Бобан Стефковски.
За време на денешниот увид на терен, Стефковски посочи дека просторот добива нов лик со цел да се создадат уредени и функционални катчиња за одмор, дружење и рекреација на жителите.
Во рамки на проектот изградени се и нови пристапни патеки со павер елементи кои треба да го олеснат движењето на пешаците.
„Нашата цел е секое маало да биде почисто, поуредено и попријатно место за живеење. Ги слушаме граѓаните и постапуваме по нивните барања, затоа што токму тие најдобро знаат што е потребно во нивното маало“, изјави Стефковски.
Тој додаде дека Општината продолжува со активностите на терен за подобрување на условите за секојдневното живеење на граѓаните.
„Градиме и создаваме. Го уредуваме јавниот простор. Создаваме подобри услови за секојдневието на граѓаните. Продолжуваме со работа на терен – за поубава Автокоманда и поубава Гази Баба!“, нагласи Стефковски.