Претседателката Гордана Сиљановска-Давкова денеска со највисоки државни и воени почести ја пречека претседателката на Република Индија, Друпади Мурму, која престојува во дводневна официјална посета на Северна Македонија.
По свечената церемонија на пречекот, двете претседателки ќе одржат тет-а-тет средба, по што е предвиден пленарен состанок меѓу македонската и индиската делегација, како и заедничка прес-конференција.
Мурму пристигна во Скопје синоќа, а на Меѓународниот аеродром Скопје ја пречека министерот за надворешни работи и надворешна трговија Тимчо Муцунски.
„Во рамките на посетата се предвидени повеќе средби и активности. Очекувам тие да ги потврдат одличните билатерални односи и да дадат нов поттик за натамошно унапредување на политичката и економската соработка меѓу двете земји“, напиша Муцунски на Фејсбук.
Во рамки на официјалната посета, индиската претседателка ќе положи венец на гробот на Гоце Делчев во црквата „Св. Спас“ во Скопје.
Предвидена е и средба со претседателот на Собранието, Африм Гаши, потпишување во Книгата на впечатоци и обраќање пред пратениците во македонскиот Парламент.
Попладне ќе се одржи македонско-индиски бизнис форум, организиран од Кабинетот на претседателката во соработка со Директоратот за економска дипломатија при Министерството за надворешни работи и надворешна трговија. На форумот ќе бидат претставени инвестициските можности на земјава, а ќе се обратат Сиљановска-Давкова и Мурму.