Народната банка внимателно ги следи светските трговски и геополитички тензии, особено по ескалацијата на кризата на Блискиот Исток и блокадата на Ормутската Теснина, кои доведоа до раст на цените на енергијата и нови шокови во понудата. Во услови на висока неизвесност, банката е фокусирана на домашните и меѓународните економски движења и е подготвена за соодветни мерки, истакнал гувернерот Трајко Славески на средбата со директорката на Светската банка за Западен Балкан, Шјиаочјинг Ју.
Славески нагласил дека кредибилната монетарна политика и ефикасните макропрудентни мерки се клучни за задржување на макроекономската стабилност и стабилноста на банкарскиот систем. Тој посочил дека Народната банка веќе покажала способност за решително дејствување, со што придонела за намалување на инфлацијата и одржување финансиска стабилност.
На средбата беше потенцирана и соработката со Светската банка во модернизацијата на платните системи во Западен Балкан, како и поддршката за интеграцијата на земјава во Единствената област за плаќања во евра (СЕПА). Директорката Ју истакнала дека пристапувањето на земјата во СЕПА веќе донесе намалување на трошоците за трансфери до 80% и очекувани регионални заштеди од околу 1 милијарда евра.
Дополнително, на средбата беше дискутирано за напредокот на повеќе проекти поддржани од Светската банка, кои ја јакнат финансиската стабилност и обезбедуваат поцелосни супервизорски оценки на корпоративниот сектор во земјава, како и за развојот на системот за брзо плаќање за домашни и регионални трансакции.