Предложените измени во начинот на организирање и функционирање на државните институции ќе бидат тема на стручна расправа што денеска ја организира Министерството за јавна администрација. Во центарот на дискусијата ќе биде Нацрт-законот за организација и работа на органите на државната управа (ЗОРОДУ), кој треба да ги постави основите за ново уредување на државната администрација.
Јавната стручна дискусија ќе се одржи под наслов „Новата архитектура на државната управа – принципи, надлежности и функционалност“. Целта е да се отворат прашања за предложените законски решенија, распределбата на надлежностите и начинот на кој институциите ќе функционираат во иднина.
На настанот ќе се обрати министерот за јавна администрација, Горан Минчев, кој ќе даде политичко-стратешки осврт на процесот на реформи во јавната администрација. Предвидено е и излагање на доц. д-р Константин Битраков од Правниот факултет „Јустинијан Први“ во Скопје, кој ќе ги презентира клучните решенија и новините содржани во нацрт-законот.
Стручниот дел ќе продолжи со панел-дискусија на која ќе учествуваат професорите Борче Давитковски, Тања Каракамишева-Јовановска и Драган Гоцевски. Тие ќе имаат можност да ги разгледаат предложените решенија од различни стручни перспективи и да дискутираат за нивното значење за организацијата и работата на државните органи.
По панел-дискусијата, предвидена е сесија со прашања и одговори, по што ќе бидат донесени заклучоци од стручната расправа. Настанот е насочен кон размена на мислења и отворање дебата за законските решенија што треба да ја уредат идната структура и функционалност на државната управа.