Заедничка и координирана акција на локално и централно ниво за почиста животна средина во главниот град. Ова е главниот заклучок од денешниот работен состанок меѓу градоначалникот Орце Ѓорѓиевски и министерот за животна средина и просторно планирање, Муамет Хоџа, на кој беа дефинирани клучните еколошки предизвици во Скопје.
Фокусот на средбата беше ставен на расчистувањето на критичните точки за да се спречат поплави, како и на довршувањето на капиталниот проект за прочистителната станица, со што ќе се овозможи заштита на реката Вардар и на подземните води во градот.
Градоначалникот преку социјалните мрежи посочи дека уредувањето на каналите и речните корита е неопходно за поголема безбедност на скопјани, притоа потенцирајќи ја важноста на довршувањето на прочистителната станица.
„Посебен акцент ставивме на довршувањето на прочистителната станица, еден од најзначајните еколошки проекти за Скопје, кој ќе овозможи почиста река Вардар, подобра заштита на подземните води и поздрава животна средина за сегашните и идните генерации. Разговаравме и за нови заеднички проекти кои опфаќаат уредување и чистење на речните корита, каналите и критичните точки низ градот, со цел подобра заштита од поплави, поголема безбедност и почисто, поуредено и поздраво Скопје.“
На крајот, тој изрази уверување дека со одговорна работа и поддршката која ја добиваат од Владата предводена од премиерот Христијан Мицкоски, брзо ќе се постигнат видливи резултати за поздрава иднина на сите граѓани.