Србија се соочува со сериозен ризик од прекин во снабдувањето со нафта и горива веќе за неколку дена, откако на 21 ноември стапуваат на сила американските санкции против руската компанија „Лукоил“, а до 25 ноември се очекува да се исцрпат и залихите на српската нафтена индустрија – НИС.
Според српските медиуми, санкциите што ги воведуваат САД против „Лукоил“ може да предизвикаат големи нарушувања во енергетските текови низ Југоисточна Европа. Србија, каде „Лукоил“ работи веќе повеќе од две децении, ќе биде директно погодена од последиците. Дополнителна неизвесност предизвика и најавата од компанијата „Гунвор“ дека се повлекува од купувањето на имотот на „Лукоил“ во странство.
Иако „Лукоил Србија“ формално не е на листата на санкционирани компании, експертите предупредуваат дека ограничувањата кон матичната компанија може да доведат до проблеми во снабдувањето и дистрибуцијата на деривати. Засега пазарот реагира претпазливо, но растот на цените на нафтата на светските берзи веќе има влијание и на домашните бензински пумпи, пишува Блиц.
Вториот критичен рок е 25 ноември, кога се очекува да се потрошат последните резерви на сурова нафта со кои располага НИС – залихи набавени пред воведувањето на американските ограничувања.
Од компанијата соопштија дека производството во рафинеријата во Панчево се одвива според планот на кризниот тим и дека има доволно нафта за преработка до наведениот датум. На последниот состанок биле презентирани и административните мерки што ги усвоила Владата на Србија, со цел да се олесни увозот на нафтени деривати и да се спречат прекини во снабдувањето.