Со современиот македонски мјузикл „Као какао“ вечерва на „Долни Сарај“ ќе биде затворено 66. издание на фестивалот „Охридско лето“.
Мјузиклот е создаден според текст и драматургија на Венко Андоновски, во режија на Дејан Пројковски, со музика на Влатко Стефановски.
„Као какао“ носи мелодрамска љубовна приказна сместена во 70-тите години на минатиот век. Преку односите меѓу ликовите се обработуваат љубовта, амбицијата и желбата за слобода, но и притисоците, стереотипите и ограничувањата со кои се соочува една генерација.
Музиката на Влатко Стефановски е во центарот на сценската приказна, која обединува голем актерски ансамбл и динамичен сценски израз исполнет со емоции, бунт и стремеж кон остварување на сопствените соништа.
Во претставата настапуваат Владимир Петровиќ, Катерина Јовановиќ, Стефан Спасов, Григор Јовановски, Рубенс Муратовски, Нина Елзесер, Ања Митиќ, Биљана Драгиќевиќ-Пројковска, Јордан Симонов, Антонио Ташковски, Дениз Абдула, Јована Миладинова, Тања Кочовска, Јована Спасиќ, Димитар Паскоски, Илин Јовановски, Анастасија Трајковска, Тодор Стојковски, Бранко Михајловски, Леонида Гулевска, Ѓорге Нешковиќ и Анастасија Митровска.
Музичките аранжмани и оркестрацијата ги потпишува Бобан Мирковски, кореографијата е на Олга Панго, сценографијата на Валентин Светозарев, а костимографијата на Марија Пупучевска.
Претставата трае два часа.
Годинашното издание на „Охридско лето“ се одвиваше во текот на 40 фестивалски денови, со вкупно 48 настани на кои учествуваа повеќе од 700 уметници од 24 земји.
Публиката имаше можност да проследи музички, драмски и балетски остварувања, концерти на реномирани солисти и ансамбли, како и премиери на театарски претстави од домашна и странска продукција.
Со богатата програма и учеството на уметници од земјата и странство, фестивалот и оваа година ја потврди својата меѓународна димензија и значајното место на светската културна сцена.