Народната банка успешно ги заврши активностите поврзани со првите две фази од компонентата за воспоставување склад на податоци за потребите на екстерните статистики, кои произлегуваат од проектот финансиран од Европската Унија „Зајакнување на капацитетот на Народната банка во областа на екстерните статистики, платежната статистика и платните системи“.
Како што информираат од Народната банка, првата фаза опфатила анализа на постојната состојба и подготовка на функционална спецификација, додека втората фаза се однесувала на изработка на дизајн на ИТ-решението и на нацрт-документот. Следните фази ќе вклучуваат развој, тестирање и имплементација на новото системско решение.
Од Народната банка посочуваат дека проектот ќе овозможи воспоставување современ склад на податоци за екстерните статистики, унапредување на интерните процеси преку дигитализација и оптимизација, зголемување на оперативната ефикасност и обезбедување поквалитетни и подостапни статистички податоци за јавноста и институциите.
Истовремено, поддршката од ЕУ претставува значаен придонес кон исполнување на обврските во процесот на европска интеграција и усогласување со статистичките стандарди и практики на Европската Унија.
Проектот, покрај воспоставување склад на податоци за екстерните статистики, вклучува и воведување на новиот светски стандард ISO 20022 во Македонскиот интербанкарски платен систем (МИПС).