Собранието денеска со 88 гласа „за“ и ниту еден „против“ или „воздржани“ ја донесе Одлуката за продолжување на кризната состојба за нафта и нафтени деривати до 20 октомври.
Владата претходно на 17 јули ја одобри оваа мерка со цел да се спречат евентуални пореметувања во снабдувањето на територијата на државата.
Новата одлука стапува на сила на 21 јули, со што се обезбедува институционален континуитет и заштита од ценовни шокови на меѓународните пазари.
Владините служби ја образложија главната цел на ваквото правно решение во Собранието:
„Целта на оваа одлука е Владата да располага со соодветен правен механизам за брза и ефикасна реакција, со цел да се зачува стабилноста во снабдувањето, да се ублажат последиците од евентуални пазарни нарушувања и да се заштитат интересите и животниот стандард на граѓаните и стопанството. Владата и понатаму внимателно ќе ги следи состојбите на домашниот и на меѓународниот енергетски пазар и доколку тоа го наложат околностите, ќе продолжи да носи навремени и соодветни мерки во интерес на сигурно, стабилно и непречено снабдување со нафта и нафтени деривати – посочија од владината прес-служба.“
Пред гласањето, пратениците од партиите на Албанците обвинија дека власта сака да го „прошверцува“ пакетот закони за високо образование, по што беше договорено тие да се тргнат од денешниот дневен ред.
Пратеникот Елми Азири од Албанска лига бурно реагираше на начинот на кој беше свикана денешната пленарна седница:
„Ние сме имале и други случаи кога сме имале закони за објавување на кризна состојба, сме биле конструктивни и истите сме ги поддржале и пак ќе го направиме истото. Но, не можеме да изигруваме наивни дека пред наши очи не се почитува Деловникот, не се почитуваат неколку члена на Деловникот. Се спомна член 74 и член 150 од Деловникот. Ќе го прочитам за граѓаните „седницата на Собранието за прво читање на предлог на законот се одржува во рок од 10 работни дена од денот на донесување на решението за свикување на седницата, но не подолго од 20 работни дена од денот на доставување на предлог на законот до пратениците“. Ве повикувам, бидејќи вие давате објаснување, ка кажете пред пратениците кој член од Деловникот е почитуван за свикување на оваа седница. Евидентно е дека имаме непочитување на неколку члена на Деловникот. Тенденцијата ни е јасна. Можноста да се избегне оваа ситуација и вие сте можеле да свикувате посебна седница кризната состојба. Додека за другите точки, во согласност со Деловникот – рече Азири.“
Координаторката на ДУИ, Рина Ајдари, побара од претставниците на Владата итно повлекување на спорните точки од дневниот ред:
„Нема ништо ургентност. Ако првата точка е продолжувањето на кризната состојба, има ме можност штом предлагачот е тука, нека излезе и нека ја повлече точката од дневниот ред и оваа точка да оди во друга нова седница, а не да има исто третирање како со другите точки од дневниот ред кои се по редовна постапка. Каде е ургентноста на ова, освен вашиот обид да направите правно шверцување на сите закони кои вас ви одат во прилог. Друга логика не гледам. Предлагачот не ка излезе и нека ја повлече точката од дневниот ред и да одиме со нова седница каде што ќе се разгледува ургентноста – рече Ајдари.“
Потпретседателот на Собранието, Антонијо Милошоски, одговори дека брзата реакција е неопходна за да се заштити енергетската стабилност на државата:
„Затоа што, доколку не се донесе оваа одлука, без разлика дали некој е од ДУИ или не е, ќе биде жртва на ваквите опструкции поради тоа што ќе биде загрозено снабдувањето со нафта и нафтени деривати. Апелирам до пратеничката група на ДУИ да го прифати аргументот дека доколку оваа седница беше свикана во редовен рок од најмалку 10 дена Собранието објективно не би можело да одлучи пред истекот на кризната состојба. Таквиот прекин би можел да предизвика негативни последици за граѓаните, за стопанството, за транспортот, за јавните служби и за целокупната енергетска стабилност на државата. Доколку не помине кризната состојба заради опструкции од страна на ДУИ, во ред, тогаш ќе имаме последица која јавноста ќе може да види заради што е настаната. Биково добро да бидеме солидарни и одговорности по однос на интересот на стопанството, на граѓаните и на енергетската стабилност – рече Милошоски.“
На крајот од денешната пленарна седница, пратениците ја утврдија потребата по скратена постапка да се донесат законите за автокампови, енергетика, привремена заштита и супервизија на осигурување.