На денешната 84. седница, Собранието официјално ја констатираше оставката на Лулзим Алиу од функцијата заменик-министер за образование и наука. Алиу, кој е кадар на коалицијата „Вреди“, својата одлука ја најави уште на 19 јануари, посочувајќи дека се повлекува од политичката позиција поради лични и професионални причини.
Во дописот до премиерот Христијан Мицкоски, тој образложи дека во овој период планира целосно да и се посвети на академската кариера.
„Мојата оставка доаѓа како одраз на моја лична и професионална анализа, ценејќи дека во овој период е најсоодветно да го продолжам својот придонес во академското поле, во мојата истражувачко-научна работа, како и посветеност кон семејството“, наведе Алиу во оставката.
Алиу упати благодарност до Владата за укажаната доверба, како и до неговата матична партија Алтернатива и нејзините лидери, посакувајќи му успех на кабинетот во понатамошната работа.