Со 64 гласа „за“, 15 „против“ и без ниту еден воздржан, македонското Собрание го изгласа новиот Закон за Советот на јавните обвинители. Ова законско решение претставува дел од поширокиот реформски процес во правосудството и е целосно усогласено со европските стандарди и препораки.
Од Министерството за правда, како овластен предлагач на законот, истакнуваат дека главната цел е зајакнување на независноста, професионалноста и транспарентноста на Советот.
„Со Законот се реформира постапката за избор на членови на Советот на јавните обвинители, се воведуваат јасни и транспарентни критериуми кои гарантираат стручност, искуство и интегритет. На тој начин, по пример на критериумите во Судскиот совет, се гарантира избор на најквалитетните кандидати“, велат од Министерството за правда.
Клучна новина е воведувањето на обврска за доследна примена на мерит-системот (систем на заслуги) и обврската за детално, аргументирано образложение на сите одлуки за избор, унапредување и дисциплинска одговорност на обвинителите.
Со законот значително се зајакнува и улогата на Советот во процесот на избор и разрешување на државниот јавен обвинител, давајќи му надлежност да поднесе иницијатива за негово разрешување до Собранието. Прецизно е уредена и постапката за разрешување на претседателот и заменик-претседателот на самиот Совет.
„Воведуваме јасна двостепеност во дисциплинските постапки. Советот одлучува како второстепен орган, а против неговите одлуки е дозволена судска заштита. Ова е директен одговор на препораките на Европската комисија“, појаснуваат од Правда.
Дополнително, транспарентноста на институцијата ќе биде подигната на повисоко ниво преку обврската за задолжително објавување на сите одлуки и извештаи, јавно одржување на седниците и обезбедување директни преноси за јавноста.