Ако Chat Gpt според Вашиот промпт ќе искреира фотографија за на веб-портал, или Gemini создаде видео кое потоа ќе биде емитувано на некој канал, а притоа Вие не напишете дека е креирано со вештачка интелигенција, сте го прекршиле етичкиот кодекс на новинарите.
По 25 години, медиумските работници добиваат нов кодекс, или како што велат неговите основачи, договор меѓу јавноста и новинарите. За првпат во него се ограничува користењето на AI. Во кодексот се наведува дека новинарскиот производ не смее да претставува целосно генерирана содржина од вештачка интелигенција, но и дека создавањето новинарска содржина со вештачка интелигенција мора да биде јасно означено.
„Новинарите не се против технологијата. Напротив, сфаќаме дека вештачката интелигенција е и ќе биде се поприсутна во редакциите. Таа може да помогне многу да се анализираат документи,да се преведуваат деск текстови, да се транскрибираат интервјуа. Меѓутоа, вештачката интелигенција никогаш нема да биде новинар“, изјави Младен Чадиковски, претседател на ЗНМ.
Основните вредности на новинарството и во 2000-тата и денеска не се менуваат. Вистината, проверката на фактите, независноста јавниот интерес и одговорноста кон граѓаните пред се остануваат темел на професијата.
Освен насоки за користењето на ВИ, новиот кодекс посветува повеќе внимание на достоинството на жртвите. Во него се наведува дека известувањето за самоубиства и обиди за самоубиства не смее да води кон детални описи и споделување експлицитни фотографии и видеоматеријали. Точноста на информацијата да се потврди од најмалку два извори, а не како досега од еден.
-Новиот кодекс на новинарите не е само збир на етички практики, или правила, туку е механизам, инструмент на саморегулацијата и на новинарството, изјави Ленора Калити, претседателка на Управен одбор на СЕММ.
„Сега следува можеби најтешкиот дел, примената на овие етички кодекси и стандарди во секојдневната работа на новинарите. Затоа е потребна мобилизација и посветеност од сите новинари“, изјави Билјана Петковска, директорка на МИМ.
Работна група го создаваше новиот кодекс две години. Во повеќефазниот процес биле вклучени медиумски работници, новинари, експерти и јавноста пред текстот целосно да биде финализиран.