Медиумите денеска направија практична споредбена тура низ главниот град во рамките на конференцијата Traffic for All – Skopje, организирана од „Го грин“, за да го прикажат потенцијалот на железничкиот јавен превоз во однос на патниот.
Турата почна со градски автобус од Карпош 4 до Маџари, по што учесниците се префрлија на воз до Железничката станица – Скопје, кој ја помина делницата за речиси пет минути додека автобусот сè уште беше на пат.
Експертот за урбана одржлива мобилност од „Го грин“, Дарко Арсовски-Петровски, истакна дека оваа активност за првпат се одржува во земјава.
„Денеска сме на Железничката станица – Скопје као дел од третата по ред конференција Traffic for All, која првпат се одржува во Македонија. Имавме можност да патуваме со ЈСП по трасата на БРТ, кој треба да се развива, а со градскиот воз стигнавме од Маџари до Скопје за експресно време од пет минути“, појасни Арсовски-Петровски.
Директорката за пруги во ЈП Железничка инфраструктура, Ивана Бикоска, информираше дека градежните активности за првата фаза од проектот „Градски воз“ на делницата од Зелениково до Скопје се во завршна фаза и се реализирани 90,88 проценти.
„Градежните активности за првата фаза се во завршна фаза и досега се реализирани 90,88 проценти. Во тек е работа на горниот строј, односно замена на дрвените прагови со бетонски, како и селективна замена на дотраените елементи во согласност со теренските услови“, изјави Бикоска, потенцирајќи дека рокот за пуштање во употреба останува 1 септември.
Директорот за патнички сообраќај, Горанчо Јовановски, потврди дека се обезбедени возни средства за самиот почеток на градскиот воз на 1 септември, но во почетната фаза бројот на возови ќе биде ограничен.
„Автобусите по возен ред возат 65 минути, а нивниот капацитет е четирипати помал од капацитетот што го имаме ние со железничкиот превоз“, изјави Јовановски и додаде: „Од први септември, во утринските часови, ќе има два воза, а во преостанатиот дел од денот ќе сообраќа по еден воз сè додека не се комплетира возниот парк“.
Паралелно со инфраструктурните најави, жителите на општина Аеродром изразија сериозна загриженост дека новата траса на брзиот автобуски превоз (БРТ) во Ново Лисиче може да уништи дел од постојниот парк „Рајска градина“.
„Се наоѓаме во паркот во Ново Лисиче, каде што е предвидено да бидат последната постојка, депото и сервисниот центар за БРТ. Тоа подразбира значителен простор, од 4,8 до 7 хектари, на кој треба да се паркираат возилата“, изјави жителот Димитар Самарџиев, кој апелираше депото да се префрли на државно земјиште од спротивната страна на улицата за да се зачува зеленилото.