Гувернерот на Народната банка, Трајко Славески, повика на разгледување на можни законски измени со кои би се вовеле дополнителни механизми за заштита на корисниците на платежните услуги и ограничување на одредени банкарски надоместоци, по примерот на повеќе европски земји.
Во објава на социјалната мрежа Икс, Славески истакна дека платниот промет е услуга што секојдневно ја користат граѓаните и компаниите, поради што прашањето за висината на надоместоците, како што наведе, заслужува поширока јавна и институционална дебата.
Тој посочи дека Народната банка во моментов нема законска надлежност директно да ги регулира надоместоците што ги наплаќаат банките, но оцени дека актуелните случувања укажуваат на потреба од разгледување на можностите за дополнување на законската рамка.
Славески додаде дека во повеќе европски држави постојат механизми за регулирање или ограничување на одредени банкарски надоместоци, кои може да послужат како основа за јавна расправа и во земјава.
Според него, целта е граѓаните и компаниите да имаат пристап до ефикасни платежни услуги со разумни трошоци, во согласност со современите европски практики.
Повикот доаѓа по најавите на неколку банки во земјава за зголемување на надоместоците за услугите во платниот промет, што отвори реакции во јавноста и дебата за потребата од поголема заштита на корисниците.