Американскиот министер за финансии Скот Бесант изјави дека нема да дозволи да биде исплашен од заканите со смрт кои доаѓаат од Иран, поради што неодамна мораше да се пресели од својот дом во Вашингтон во американска воена база.
Во интервју за телевизијата Си-ен-би-си, Бесант истакна дека неговата безбедност е подредена на упатствата од Тајната служба, но порача дека нема место за страв кога се соочува со слични предизвици со кои секојдневно се соочуваат и американските војници.
„Зошто да се плашам кога храбрите припадници на нашата војска во Персискиот Залив, како и претседателот Трамп, постојано добиваат закани со смрт?“, порача Бесант.
Иран се однесува како „животно втерано во ќош“
Американскиот министер оцени дека Техеран во моментов се однесува „како опасно животно втерано во ќош“. Тој посочи дека дел од безбедносните ризици биле дополнително зголемени откако „Волстрит џурнал“ во јануари 2025 година објавил фотографија од неговата резиденција во вашингтонската населба Џорџтаун направена од воздух, потег кој го оценил како „исклучително неодговорен и опасен“.
Од друга страна, официјален Техеран ги отфрли обвинувањата, негирајќи дека планира напади врз американски службеници и граѓани на територијата на САД. Сепак, разузнавачките извештаи предупредуваат дека иранските планови за напади врз американски персонал се во напредна фаза.
„Операција економски отпадник“ и кризата во Ормуската Теснина
Бесант од август раководи со новата американска кампања за санкции и економски притисок врз Иран, наречена „Операција економски отпадник“. Главна цел на оваа иницијатива е да го принуди Техеран да ги запре нападите врз поморскиот сообраќај и повторно да ја отвори Ормуската Теснина, која е во голема мера затворена од 28 февруари, кога САД и Израел го нападнаа Иран.
Кампањата се спроведува паралелно со поморската блокада на иранските пристаништа и опфаќа строги санкции за финансиските институции и банки на Блискиот Исток кои олеснуваат трансакции со иранската страна.