Со изложбата „Солидарноста како иднина“ вечерва во Музејот на современата уметност во Скопје ќе започне четиридневниот меѓународен форум „Европски дијалози“, посветен на европското наследство, граѓанското општество и иднината на Европската Унија.
Форумот го организираат Францускиот институт во Париз, Францускиот институт во Скопје и Амбасадата на Франција во Северна Македонија.
Изложбата „Солидарноста како иднина“ го претставува примерот на меѓународна културна солидарност со Скопје по катастрофалниот земјотрес во 1963 година. По земјотресот, бројни уметници од Франција и од други европски земји донирале дела, со што придонеле за формирањето на колекцијата на Музејот на современата уметност.
На изложбата ќе бидат претставени дела од познати француски, македонски и европски автори, меѓу кои Пјер Сулаж, Виктор Вазарели и Никола Мартиноски, како и други уметници чии дела се дел од музејската колекција.
Во рамки на „Европските дијалози“, од 29 септември до 2 октомври ќе се одржат јавни дебати, предавања, работилници, разговори и културни настани. На нив ќе учествуваат истражувачи, новинари, активисти, уметници, студенти, дипломати и претставници на институции од Северна Македонија, Франција и други европски земји.
Годинашното издание е завршен настан од програмата „Споделени хоризонти“, а фокусот ќе биде ставен на заедничкото европско наследство, колективната меморија, граѓанските иницијативи и предизвиците со кои се соочува Европската Унија.
Манифестацијата ќе заврши на 2 октомври во „Лабораториум“, со заеднички музички настап на францускиот диџеј Милс и скопскиот диџеј Дарко.