Цените на нафтата на светските берзи забележаа нов раст и ја надминаа границата од 90 долари за барел, покренати од зачестените прекини во бродскиот сообраќај низ Ормутскиот теснец и новата ескалација на тензиите меѓу САД и Иран.
На лондонската берза барелот се тргуваше по цена од 90,16 долари, што е зголемување за 1,13 долари во споредба со претходниот ден. На американскиот пазар, цената исто така се зголеми за 1,75 долари и достигна 85,34 долари за барел.
Трговците и пазарните аналитичари со зголемено внимание го следат протокот на танкери во Ормутскиот теснец и Црвеното Море. Според информациите од иранските медиуми, Иранската револуционерна гарда запрела два танкери кои се обиделе да транзитираат низ теснецот, додека уште четири други plовила биле принудени да ја променат својата рута.
Иранските власти објавија дека сообраќајот низ оваа стратешка поморска точка останува суспендиран по новите напади на САД во регионот, на што Техеран одговори со напад врз американска база во Кувајт. Податоците од следењето на пловидбата покажуваат дека транзитот на сурова нафта е сведен на минимум.
Истовремено, ситуацијата дополнително се комплицира во Црвеното Море, каде јеменското движење Ансар Алах блокираше саудиски пристаништа како одговор на саудиската блокада врз Јемен. Од движењето, сепак, тврдат дека сите останати бродови можат да пловат безбедно.
Пазарните експерти посочуваат дека динамиката на формирање на цената веќе се потпира директно врз реалните податоци за логистиката и транспортните капацитети, а не само врз воената реторика.
„На пазарот повеќе не се тргува врз основа на воени вести, туку врз основа на податоци за превозот“, рече Оле Хвалби, пазарен аналитичар во SEB Research.
Паралелно со кризата, Саудиска Арабија започна иницијатива за формирање коалиција за заштита на пловидбата во Баб ел-Мандеб, Црвеното Море и Аденскиот Залив, иницијатива која досега доби поддршка од 14 држави.