Цените на нафтата на светскиот пазар денес пораснаа за повеќе од два проценти поради ескалацијата на конфликтот на Блискиот Исток и прекините во транспортот на енергија преку Ормутскиот теснец.
Според берзанските извештаи кои ги пренесува „Трејдинг економикс“, меѓународната референтна цена на нафтата Брент се тргуваше по околу 93 долари за барел, додека американската сурова нафта WTI се приближи до нивото од околу 91 долар за барел.
Врз ваквиот брз раст на цените на нафтените деривати дополнително влијаеше и новата реторика која доаѓа од Белата куќа.
Вашингтон повторно ќе одговори остро на Иран, оценувајќи дека Техеран ја пропуштил можноста да постигне договор преку преговори – изјави американскиот претседател Доналд Трамп.
Тензиите дополнително се зголемија по иранските напади врз неколку земји од Персискиот Залив, вклучувајќи ги Бахреин, Јордан и Кувајт, кои уследија по американските воени акции во самоодбрана поради соборување на американски хеликоптер.
Пазарот на нафта останува под силен притисок бидејќи Иран продолжува да го ограничува преминувањето на голем дел од бродскиот сообраќај преку Ормутскиот теснец, додека САД воведоа дополнителни санкции за иранските пристаништа.
Паралелно со геополитичката криза, порастот на цените беше поттикнат и од најновите официјални податоци од американската Администрација за енергетски информации (EIA).
Според нивниот извештај, залихите на сурова нафта во САД се намалени за 7,228 милиони барели минатата недела, што претставува седми последователен неделен пад кој сериозно ги надмина очекувањата на аналитичарите.