Претседателката Гордана Силјановска-Давкова денеска порача дека Преспанскиот договор јасно го регулира користењето на термините за државните институции, но дека употребата на придавката „македонски“ во однос на идентитетот и народот не може да се забрани.
Реакцијата на претседателката следува по новинарски прашања за вербалната нота врачена до бугарскиот амбасадор, поради изјавата на новата шефица на бугарската дипломатија, Велислава Петрова-Чамова, која го употреби терминот „северномакедонски“.
Силјановска-Давкова нагласи дека нејзиниот став кон договорот од Преспа не е променет и дека токму потписниците треба први да инсистираат на негово доследно почитување во меѓународните односи.
„Не се забранува ниту, пак, може да се забрани употребата на придавката македонски. Впрочем, тоа е и дел од самиот договор. Е, сега, оние што го поддржале и што го потпишале договорот први треба да укажуваат на неговото почитување“, изјави претседателката.
Таа изрази очекување за конструктивност од новата влада во Бугарија, потенцирајќи дека регионалното разбирање е клуч за евроинтеграцискиот пат на целиот Западен Балкан.