Претседателката Гордана Сиљановска-Давкова синоќа го отвори петтото издание на Интернационалниот фестивал на детски театри „Игор Маџиров“, чија покровителка е таа. Во обраќањето порача дека театарот ги надминува разликите меѓу луѓето и овозможува подобро разбирање на туѓите искуства и чувства.
„Театарот нè учи да погледнеме подалеку од разликите, да го слушнеме другиот и во неговото искуство да препознаеме нешто блиско и свое, наше, заедничко, човечко“, истакна Сиљановска-Давкова.
Таа ги поздрави уметничките успеси на Театарот за деца и младинци, нагласувајќи дека тие се постигнати во скромен простор, кој со децении не е променет. Според неа, годинашното мото на фестивалот „Сите сме исти. И јас и ти“ претставува повик за почитување на правото на секој човек на сопствен живот, свет и приказна.
Претседателката посочи дека богатото уметничко наследство на актерот Игор Маџиров продолжува да живее преку фестивалот и претставите што се играат на сцената на Театарот за деца и младинци.
Таа повторно ја упати својата желба театарот конечно да добие соодветен дом, каков што заслужуваат актерите и најмладата публика.
„Преку играта, смеата и тагата, храброста и сомнежот, правдата и неправдата, театарот како уметност на невозможното ни помага да ги препознаеме човечките слабости и доблести, внатрешните борби, да се радуваме и да се нервираме, бурно да реагираме“, рече Сиљановска-Давкова.
Таа нагласи дека создавањето претстави за деца носи посебна одговорност, бидејќи најмладите се љубопитни и критички настроени гледачи кои внимателно ја следат приказната и отворено ги изразуваат своите ставови.
„Детето не е рутиниран гледач што мирно ја следи приказната, туку немирен, разбрануван, бистар, љубопитен ум што мисли брзо, поставува многу незгодни и смели прашања, остар и прецизен набљудувач, бескомпромисен критичар“, истакна претседателката.
Според неа, фестивалот „Игор Маџиров“ преку уметничката храброст и творечката енергија поврзува различни култури, генерации и светогледи.
Фестивалот беше отворен со претставата „Која е Лорет“, а на програмата се претстави од Македонија, Србија, Хрватска, Чешка и Шпанија. Предвидени се и работилници со гости од Бугарија, Грција и Босна и Херцеговина.
На фестивалот учествуваат истакнати автори, режисери, актери и драмски писатели, а билетите за претставите се достапни во билетарницата на Театарот за деца и младинци во Скопје.