Силен земјотрес со јачина од 5,7 степени според Рихтеровата скала денеска ја потресе Турција, предизвикувајќи вознемиреност кај населението во регионот кој уште ги зацелува раните од минатите катастрофи.
Според достапните податоци, епицентарот на земјотресот се наоѓал во областа Малатја, која пред три години претрпе разорен земјотрес. Потресот бил со плитка длабочина, што придонело да се почувствува на огромна оддалеченост.
„Хипоцентарот на земјотресот, според Европско-медитеранскиот сеизмолошки центар, се наоѓа на длабочина од приближно 8 километри под површината на земјата. Земјотресот бил почувствуван дури до Сирија, но и до Либан.“
Граѓаните од соседните држави веднаш почнаа да споделуваат сведоштва на социјалните мрежи за силината на денешниот потрес.
„Беше почувствуван во Бејрут“, пишуваат луѓето на платформата EMSC.
Засега на терен нема информации за сериозни последици, но локалните власти се во состојба на претпазливост. Досега нема извештаи за материјална штета или повредени, а надлежните служби ја следат ситуацијата.
Сепак, турските експерти веднаш алармираа за сеизмичката активност во овој конкретен регион, нагласувајќи дека опасноста од поголеми потреси не е помината.
„Проф. д-р Сулејман Пампал изјави за CNN Turk дека Малатја е многу чувствителен регион. „Околните раседи можат да предизвикаат земјотреси над 7 степени според Рихтеровата скала. Тука се раседите Оваџик и Малатја. Малатја е чувствителен регион поради близината на овие раседи. Овие раседи акумулирале енергија. Затоа, земјотресите таму нè загрижуваат. Раседот Једису е следен на ред. Во регионот има раседи кои акумулирале енергија 250 години и можат да предизвикаат земјотреси над 7 степени според Рихтеровата скала“, рече тој.“