Пред Основниот суд во Штип денеска сведочеше 74-годишниот Денис Асанов, обвинет за свирепото убиство на 79-годишната Борјанка Николова. Асанов пред судијката Јулијана Недкова целосно го смени првичниот исказ даден пред истражните органи и побара ослободителна пресуда.
Обвинетиот тврдеше дека ја затекнал Борјанка мртва во бањата, но не пријавил бидејќи немал кредит на телефонот. Тој изнесе и филмско сценарио според кое двајца млади луѓе му ставиле вреќа на глава, го врзале за дрво и почнале да копаат дупка во дворот, додека неговиот очув му се заканувал да молчи.
„Никогаш во животот ни кокошка не сум заклал, а камоли човек“, изјави Асанов во судницата, додавајќи дека жртвата често престојувала кај него во изминатите три месеци.