Саудиска Арабија ги намали испораките на нафта за европските пазари откако напади со беспилотни летала го оштетија нејзиниот главен извозен нафтовод кон Црвеното Море. Информацијата ја објавија трговски извори за „Ројтерс“, а ситуацијата ги принуди големите европски купувачи, особено Полска, итно да бараат алтернативни извори на снабдување.
Според истите извори, Саудиска Арабија за нападите ги обвинува ирачките паравоени групи. Поради настанатите оштетувања, властите во петокот го затворија пустинскиот нафтовод Исток-Запад, кој во последните шест месеци претставуваше клучна алтернатива за заобиколување на блокадата на Ормутскиот теснец.
Трговските извори во вторникот потврдија дека Саудиска Арабија веќе ги известила европските купувачи за откажување на дел од септемвриските испораки, додека товарењето на сурова нафта во пристаништето Јанбу на Црвеното Море е привремено запрено. Од државната нафтена компанија „Сауди Арамко“ одбија да ја коментираат ситуацијата.
Прекинот на протокот најверојатно ќе го принуди Ријад да се потпре на таканаречени тајни пратки преку Ормутскиот теснец, пракса што веќе ја применуваат Ирак и ОАЕ. Овој начин на транспорт овозможува одржување на извозот од Заливот на ниво меѓу 7 и 9 милиони барели дневно, што изнесува од 30 до 40 отсто од количините пред конфликтот.
Новите нарушувања во снабдувањето веднаш се одразија врз цените на пазарот. Според податоците од LSEG, фјучерсите за сурова нафта од типот Брент се тргуваа близу 108 долари за барел, додека физичките цени во Европа беа повисоки, при што референтната вредност достигна околу 122 долари за барел.