Шест нови случаи на западнонилска треска се регистрирани во земјава за само еден ден, со што вкупниот број на потврдени случаи се искачи на 50. Петмина од новозаболените се од Скопскиот регион, а прв случај е потврден и во Куманово.
Тројца од новите пациенти се жители на Гази Баба и се на возраст над 70 години. Еден пациент е 26-годишен жител на Зелениково, а уште еден, на возраст од 59 години, е од Аеродром.
Во Куманово вирусот е потврден кај 65-годишен маж од приградска населба, кој пред да се разболи не патувал надвор од државата. Пациентот е хоспитализиран на Клиниката за инфективни болести во Скопје, а од Центарот за јавно здравје Куманово информираат дека неговата состојба е тешка и дека има и повеќе хронични заболувања.
Кај семејството на заболениот е спроведена епидемиолошка анкета, по што се најавени и мерки за дезинсекција на просторот каде што престојувал, како и на други локации каде што постои можност да бил каснат од заразен комарец.
Речиси половина од заболените од западнонилска треска се хоспитализирани на Инфективната клиника со тешка невроинвазивна форма на болеста, која може да предизвика воспаление на мозокот и мозочните обвивки. Досега летово од болеста починале пет лица.